मुंबई | विभागीय प्रतिनिधी चक्रधर मेश्राम दि 9 जुलै 2021:-
पुण्यातील भोसरी येथील एमआयडीसी मधील भूखंडाच्या घोटाळ्याप्रकरणी ईडीने मंगळवारी १३ तास एकनाथ खडसे यांचे जावई, गिरीश चौधरी यांची कसून चौकशी केली आहे. त्यानंतर त्यांना अटक करण्यात आली आहे. आता सध्या ते ईडीच्या कोठडीमध्ये आहेत. जावयाच्या अटकेनंतर, सासरे एकनाथ खडसे यांना ही चौकशीला हजर राहण्या संदर्भात समनास बजावण्यात आले होते. त्यानंतर ईडीच्या समनासास अनुसरून एकनाथ खडसे हे गुरुवारी सकाळी ११ वाजण्याच्या सुमारास ईडीच्या कार्यालयात हजर झाले होते. ईडीच्या अधिकाऱ्यांनी त्यांची आठ तासाहून अधिक वेळ कसून चौकशी केली आहे.
राष्ट्रवादी काँग्रेस पक्षाचे ज्येष्ठ नेते, आणि माजी महसूल मंत्री, एकनाथ खडसे यांच्या जावायास ईडी अर्थात सक्त वसुली संचालनालयाने अटक केल्यामुळे, एकनाथ खडसे यांच्या अडचणीत वाढ झाली आहे. ईडीच्या समनासा नुसार चौकशीला जाण्यापूर्वी एकनाथ खडसे यांनी प्रसारमाध्यमांशी चर्चा केली आहे. यावेळी त्यांनी सांगितले की, माझ्यावरील कार्यवाहीच्या पाठीमागे राजकीय सुडाची भावना असून, मी पक्ष बदलल्यामुळे भाजपच्या लोकांनी माझ्या चौकशा सुरू केल्या आहेत.
नाथा भाऊंना खेळवण्यासाठी नियोजित केलेलं, हे एक षडयंत्र आहे, असा आरोप खडसे यांनी केला आहे. जळगाव मधील भाजप कार्यकर्त्यांच्या व्हाट्सअप ग्रुपवर, अभी कुछ होने वाला है, असा एक संदेश फिरत आहे. यावरून हे सर्व प्रकरण राजकीय हेतूने प्रेरित असल्याचे षड्यंत्र दिसत आहे. पण मी कोणत्याही चौकशीला सामोरे जाण्यास तयार आहे. सदरची जमीन ही एमआयडीसीची नाही. ती खाजगी मालकीची आहे. एमआयडीसीने सदर जमीन संपादित केलेली नाही. त्याचा मोबदला ही दिलेला नाही तसेच त्यांनी ताबा ही दिलेला नाही. आम्ही सर्व खाजगी व्यवहार केलेले आहेत.
हे भूखंड खरेदी केला होता, तेव्हा त्यावर मूळ मालकाचे नाव होते. हे मी वारंवार सांगितले आहे. या प्रकरणी पाच वेळा चौकशी झाली आहे. तसेच अँटी करप्शन ब्युरोने ही चौकशी केली आहे. त्यामुळे या आरोपात कोणत्याही प्रकारचे तथ्य नसल्याचा आरोप त्यांनी केला आहे. फडणवीस सरकारच्या काळात एकनाथ खडसे महसूल मंत्री होते. त्यावेळी पुण्यातील भोसरी एमआयडीसी येथील तीन एकर जमीन प्लॉट खरेदी करण्यासाठी पदाचा गैरवापर केल्याचा आरोप २०१६ मध्ये झाला होता. ३१ कोटी रुपयांची किंमत असलेला हा भूखंड निव्वळ ३.७ कोटी रुपयांना म्हणजे खूप कमी बाजारमूल्य दाखवून खरेदी केल्याचा आरोप त्यांच्यावर लावण्यात आला आहे.
