🌀 आंबेडकरी राजकारणाला स्वाभिमानशून्य विचारवंतांची वाळवी.

जा आणि तुमच्या घराच्या भिंतीवर लिहून ठेवा कि तुम्हाला शासनकर्ती जमात बनायचे आहे . हे डॉ . बाबासाहेब आंबेडकर यांचे वाक्य आंबेडकरवादी मतदारांनी भिंतीवरच नाही तर आपल्या मनपटलावर परमनंट मार्करने नोंदविले आहे यात शंका नाही . मग आपण शासनकर्ती जमात का बनू शकत नाही ? ज्या ज्या वेळी आंबेडकरी चळवळ सत्तेच्या दिशेने वाटचाल करीत असते तेंव्हा प्रस्तापित पक्षांनी गुलाम बनवलेले पगारी, चमचे, स्वयंघोषित विचारवंत, समाजसेवक, तज्ञ लोक आडकाठी घालतात हे दिसुन आले आहे .

नुकत्याच झालेल्या लोकसभेच्या निवडणूकीत अशा छद्म आंबेडकरवाद्यांवर शिक्कामोर्तब झालेलं आहे . ज्यावेळी समाजावर अन्याय होतो तेंव्हा हे अभ्यासू विचारवंत अहिंसेचा व तडजोडीचा गांजा फुकून निद्रित अवस्थेत गेलेले असतात अन् निवडणूकांचं बिगुल वाजताच हे झोपेचं सोंग घेतलेली कुंभकर्णाची पिलावळ अचानक जागी होते . निवडणूका हा यांच्या सुगीचा हंगाम असतो . प्रस्तापितांच्या चमडी बचाओ राजकारणापेक्षा चळवळीत आंबेडकरवादाची शाल पांघरलेले अल्पअभ्यासू, उच्चशिक्षित लोकांचे चमडी बचाओ राजकारण चळवळीला अधिक धोकादायक आहे याची जाणीव आंबेडकरी समाजाला झालेली आहे .

मुझे पढे लिखे लोगोंने धोका दिया है !

हे बाबासाहेबांचं वाक्य बाळासाहेबांच्या तोंडी आले तर नवल वाटणार नाही . २०१९ च्या लोकसभेच्या निवडणुकीत वंचित आघाडीने घेतलेली भरारी या लोकांना मुळीच पटलेली नाही असे स्पष्ट दिसून येते . पण यांच्या संविधान धोक्यात असल्याच्या एका अफवेने वंचितचा प्रभाव कमी करण्यात ते यशस्वी ठरले आहेत . आंबेडकरी असणारा अर्थतज्ञ मोदींनी अर्थव्यवस्थेची कशी वाट लावली हे न सांगता बाळासाहेबांची भूमिका भाजपसाठी कशी पोषक आहे हे मात्र मिडीया समोर येऊन सांगतो . शिक्षणतज्ञ असणारा स्वतःला आंबेडकरी समजणारा एका विद्यापीठातील उच्च पदावर काम केलेला बाजारबुणगा विचारवंत मोदींनी शिक्षणाचा कसा खेळखंडोबा केला आहे हे न सांगता वंचित आघाडीला मत म्हणजे भाजपला मत असे पत्रकार परिषदेत सांगतो .

हेच नाही तर दिल्लीच्या जंतरमंतर मैदानावर काँग्रेसच्या विरोधात छद्म गांधीवादी आंदोलनाला पाठिंबा देत ज्यांनी भाजपचं सरकार निवडून येण्यास छुपी मदत केली असे अभ्यासू समाजसेवक निवडणूकीपूर्वी मात्र निर्भय बनोच्या नावाने संविधान धोक्यात आहे असे सांगून लढवय्या आंबेडकरी मतदारांना नाऊमेद करण्याचे काम करतात .

अनेक पत्रकार मंडळी विश्लेषण करताना बाळासाहेबांची भूमिका योग्य असली तरी ती भाजपला मदत करणारी आहे असे मत शेवटी व्यक्त करायचे . या सगळ्यांचा परिणाम २०२४ च्या लोकसभेच्या निवडणुकीत झाला . यावेळी मात्र वंचित भाजपची बी टीम आहे असे म्हणण्याचे धाडस महाविकास आघाडीच्या नेत्यांनी केलेले नाही . कारण बाळासाहेब आंबेडकरांनी अनेक ठिकाणी महाविकास आघाडीच्या उमेदवारांना जाहीर पाठिंबा देऊन अन् त्यांच्यासाठी प्रचारसभा घेऊन त्यांना आपल्या विरोधात बोलण्याची संधी दिली नाही .

पण जेंव्हा वंचितला भाजपची बी टीम म्हणायला संधी मिळाली नाही तेंव्हा संविधान धोक्यात असल्याची आरोळी ठोकून दलित मतदारांना आपल्याकडे खेचण्यात मविआचे नेते यशस्वी झाले . पण संविधान विरोधी शक्तीला मोठं करण्याचे काम कुणी केले यासाठी मविआ नेत्यांनी आत्मचिंतन करावे . कारण मविआ नेत्यांच्या पक्षांतराच्या भूमिकेवरून त्यांना वंचित पेक्षा भाजप बरी असे वाटत असणार . संविधान बदलाच्या एका भीतीने वंचितचा वटवृक्ष तोडण्याचे महापाप या विचारवंतांनी, तज्ञांनी केले . उद्या मविआ मधील एखाद्या पक्षाने एन डी ए मध्ये प्रवेश केला तर या पत्रकार मंडळींची तोडं दाखवायला जागा मिळणार नाही . या पडिक पांडित्य सांगणाऱ्या लोकांनी हे कायमचं लक्षात ठेवावे कि तुमच्या पळपुट्या भुमिकेमुळे वंचित आघाडीची झेप मंदावली असली तरी आंबेडकरी चळवळीची व दलित राजकारणाची पाळमुळं समाजमनावर कायमची रुजलेली आहेत .

प्रा . रविंद्र आठवले.

मो. – 9096792440