🌀 कृषिक- प्रात्याक्षिकेयुक्त कृषि प्रदर्शन २०२३बारामती. 🌀

(विशेष प्रतिनिधी प्रा. गोरख साठे यांजकडून)

अँग्रीकल्चरल डेव्हलपमेंट ट्रस्ट बारामतीच्या कृषि विज्ञान केंद्र, कृषी महाविद्यालय, अटल इनक्युबेशन सेंटर, मायक्रोसॉफ्ट व ऑक्सफर्ड विद्यापीठ मंडन यांचे संयुक्त विद्यमाने आयोजित केलेल्या कृषिक २०२३ या आंतरराष्ट्रीय कृषी प्रदर्शनाचे उद्घाटन मायक्रोसॉफ्टने कार्यकारी संचालक डॉ. रणवीर चंद्रा व डॉ. अजित जावकर, संचालक Artificial Intelligence Division, ऑक्सफर्ड विद्यापीठ लंडन यांच्या उपस्थितीत ३ जानेवारी २०२३ रोजी माळेगाव खुर्द, शारदानगर बारामती येथे संपन्न झाला. या प्रदर्शना बाबतची माहिती अॅग्रीकल्चरल डेव्हलपमेंट ट्रस्टचे चेअरमन मा. राजेंद्र पवार यांनी आज पत्रकार परिषदेत दिली. कृषिक या आंतरराष्ट्रीय कृषि प्रदर्शनामध्ये मायक्रोसॉफ्ट मार्फत बारामती येथे उभारण्यात येणा-या सेंटर ऑफ एक्सलन्स ऑन फार्म व्हाइब्ज या कृषि संशोधन प्रकल्पातील अनेक प्रात्यक्षिके शेतकऱ्यांसाठी, युवकांसाठी व नवउद्योजकांसाठी दाखविण्यात येणार आहेत. या कार्यक्रमासाठी संस्थेचे अध्यक्ष व माजी कृषि मंत्री मा. शरदचंद्रजी पवार, विरोधी पक्षनेते मा. अजित पवार, खासदार मा. सुप्रिया सुळे, तसेच संस्थेचे विश्वस्त मा. प्रताप पवार व इतर मान्यवर जसे की आयआयटी खरगपुर, आयआयटी कानपुर, आयसीएआरचे प्रतिनिधी, मफुकृवि राहुरीचे मा.. कुलगुरु डॉ. प्रशांतकुमार पाटील, अटारी पुणे चे संचालक डॉ. लाखन सिंह व कृषि क्षेत्रांशी निगडीत नामांकित कंपनीचे प्रतिनिधी यांची उपस्थिती होती.कृषिक या आंतरराष्ट्रीय कृषि प्रदर्शनामध्ये १७० एकरवर बी-बियाणे, खते, पिककिट व रोग नियंत्रण या आधारित अत्याधुनिक तंत्रज्ञानावर प्रात्यक्षिक प्रकल्प उभारण्यात आले आहेत. शेतक-यांना Artificial Intelligence, IOT Precision Agriculture, Vertical Farming. Urban Farming. रोबोटचा कृषि क्षेत्रात वापर, दुग्ध आणि फळप्रक्रिया क्षेत्रातील अत्याधुनिक तंत्रज्ञान, Climate Smart Agriculture Practices, दूध व भाजीपाला प्रक्रिया उद्योग, जर्मनी, फ्रांस देशातून आयात केलेले नॅनो तंत्रज्ञान, सेंद्रिय शेती, होमिओपॅथी तंत्रज्ञान, आंतरराष्ट्रीय भरड धान्य वर्ष- २०२३ अंतर्गत मिलेट दालन व पीक प्रात्याक्षिके, कोरडवाहु शेती साठी वरदान ठरलेले एरंडी, जवस, बकव्हीट यांची नवीन वाणांची ओळख व आंतरपीक पद्धती, जपान, अमेरिका, तैवान, नेदरलंड, थायलंड इ. देशातून आयात केलेले बियाणांचे तंत्रज्ञान, खतांची मात्रा १००% लागू होण्यासाठी उत्प्रेरकांचा वापर (नॅनो कार्बन तंत्रज्ञान) फवारणी व रोग कीड निरीक्षण करणारे ड्रोन प्रात्याक्षिके, जमीन आरोग्य सुधारणा मार्गदर्शन, परदेशी व देशी फुलपिके यांची लागवड व विक्री तंत्रज्ञान, स्वयंचलित पशुचिकित्सा प्रणाली, अपारंपारिक उर्जा खोतांचा आधुनिक शेतीसाठी वापर, भाजीपाला पिकातील कलम तंत्रज्ञान व पिक प्रात्याक्षिके, ऊस पिकातील विविध अंतरपीक पध्दती सूक्ष्म सिंचन प्रणाली, संरक्षित शेती पिक उत्पादन तंत्रज्ञान, Natural Farming. परस बागेतील कुक्कुटपालनासाठी विविध जाती, बायोफ्लॉक तंत्रज्ञानाचा वापर करून मत्स्य पालन, अत्याधुनिक यंत्रसामुग्री व औजारे प्रात्याक्षिके असे अनेक नाविण्यपुर्ण उपक्रम पाहण्याची संधी खुली राहणार आहे.शेतक-यांसाठी हे प्रदर्शन १९ जानेवारी ते २२ जानेवारी २०२३ दरम्यान सुने राहिल आणि २ जानेवारी ते १८ जानेवारी यादरम्यान स्टार्टअप किंवा इतर इन्होव्हेटर असतील त्यांच्यासाठी वेबिनारचे आयोजन केलेले आहे. वरील सर्व विषयांच्या प्रशिक्षणाचा लाभही शेतक-यांना भविष्यात घेता येईल.मा. बिल गेट्स यांचे संकल्पनेतून मायक्रोसॉफ्ट या कंपनीने बारामती येथे कृषि क्षेत्रावर आधारित संशोधन प्रकल्प विकसित करणेचे पाउल उचलले आहे. प्रोजेक्ट Farmvibesai हा मायक्रोसॉफ्ट रिसर्च मधील शेती केंद्रीत तंत्रज्ञानाचा एक नवीन संच आहे. मायक्रोसॉफ्टने अलिकडेच ही साधने सर्वांसाठी उपलब्ध करुन दिली आहेत. जेणेकरून संशोधन, डेटा शास्त्रज्ञ, शेतकरी आणि विद्यार्थी यांना कृषी क्षेत्रातील माहितीमध्ये बदल व सुधारणा करण्यासाठी सक्षम केले जाऊ शकते. या प्रकल्पातील मशीन लर्निंग अल्गोरिदम तंत्राव्दारे जमिनीची सुपीकता वाढवणे, उत्पादनात वाढ करणे. पीक पध्दती नियोजन करणे. पिकांचे आरोग्य उत्तम राखणे, गुणवत्तेमध्ये वाढ करणे आणि त्या मागील खर्च कमी करण्यास मदत होऊ शकते. Microsoft Azure या प्लॅटफॉर्मवर चालणारे Farmvibes.ai अल्गोरिदम, जमिनीतील सेन्सर्स, आकाशातील ड्रोन आणि अवकाशातील उपग्रह यांच्यामार्फत माहिती गोळा करुन “भविष्यातील अत्याधुनिक शेती तयार करण्यासाठी जगभरातील विविध घटकाला सक्षम करु शकतात. या तंत्रज्ञानाचा वापर करून शेतकरी त्याच्या शेतात योग्य प्रमाणात खत व पाणी व्यवस्थापन आणि तणनाशक वापरु शकतो आणि त्याच्या शेतातील तापमान आणि वा-याच्या वेगाचा व पावसाचा अंदाज लावू शकतो. तसेच याद्वारे त्याच्या शेतीचे उत्पादन वाढवू शकतो. विशेषत: Farmvibes ai मधील नाविण्यपूर्ण संशोधनासाठी हे तंत्रज्ञान वापरण्यात येणार आहे.